Вы тут

Самыя цікавыя навіны з Алімпіяды ў Пхёнчхане


У дайджэсце «Звязды» збіраем самыя цікавыя навіны з Карэі і расказваем пра тое, што застаецца за кадрам спаборніцтваў.


Канадзец Марк Макморыс заваяваў «бронзу» Алімпіяды-2018 у слоўпстайле. У сакавіку 2017 года пасля падзення на адным з турніраў спартсмен зламаў сабе сківіцу, левую руку, некалькі рэбраў і таз, разарваў селязёнку і пашкодзіў лёгкае. Праз дзве гадзіны ў бальніцы Ванкувера ўрачы з цяжкасцю вярнулі яго да жыцця.

Пасля гэтага Марк месяц правёў у ложку. «Яму было нязручна сядзець, нязручна стаяць, нязручна спаць. Ён не мог самастойна паесці, рукі проста не фіксаваліся каля рота — настолькі ўсё было знявечана», — расказваў фізіятэрапеўт Дэм'ен Мароні. Праз 8 месяцаў пасля падзення Макморыс выйграў этап Кубка свету ў Кітаі. «Тое, што зрабіў мой арганізм, — сапраўднае вар'яцтва. Я рыхтаваўся да смерці. Пасля таго выпадку ні адзін дзень на гэтай зямлі я не прыму як сам сабой зразумелы», — сказаў тады спартсмен.

У Пхёнчхане Макморыс выйграў другую алімпійскую «бронзу» запар. За пару тыдняў да Гульняў-2014 ён зламаў рабро, але ўсё роўна стаў трэцім у Сочы.

Стадыён на месяц

Галоўны стадыён Алімпіяды-2018, дзе ўжо прайшла цырымонія адкрыцця Гульняў, разбяруць адразу пасля заканчэння Параалімпіяды ў сакавіку гэтага года. Нагадаем, арэна разлічана на 35 тысяч месцаў і была дабудавана толькі ўвосені 2017-га. Плануецца, што на яе месцы ў цэнтры Пхёнчхана з'явяцца музей і іншыя месцы для забавы. Спачатку арганізатары планавалі правесці цырымоніі адкрыцця і закрыцця Алімпійскіх гульняў на вялікім стадыёне ў адным з найбліжэйшых гарадоў, але жыхары Пхёнчхана не падтрымалі гэтую ідэю. Такім чынам, бюджэт Алімпіяды-2018 вырас да 12,4 мільярда долараў — гэта ў паўтара раза больш за суму, якую прагназаваў Сеул у 2011-м, калі карэйская заяўка перамагла.

Адзначым, што з алімпійскімі аб'ектамі такія трансфармацыі адбываюцца часта, напрыклад, стадыён «Фішт» у Сочы, на якім праходзілі цырымоніі адкрыцця і закрыцця Алімпіяды-2014, у першапачатковым выглядзе больш ніколі не выкарыстоўваўся. Да чэмпіянату свету па футболе яго рэканструявалі, і ранейшай засталася толькі назва.

Мексіка здзіўляе

Мексіканцы наўрад ці будуць здзіўляць аматараў спорту сваімі перамогамі або нечаканымі спартыўнымі вынікамі. Краіна прадстаўлена ўсяго ў трох дысцыплінах лыжнага спорту — горных лыжах, лыжных гонках і фрыстайле. Але яе прадстаўнікі вырашылі браць іншым — касцюмамі.

Беларусы ў чацвёрты дзень Алімпіяды

У аўторак нашы спартсмены прынялі ўдзел у спаборніцтвах па горных лыжах і лыжных гонках. Юрый Данілачкін выступіў у гарналыжнай камбінацыі, якая ўключае ў сябе хуткасны спуск і слалам. Беларус прайшоў дыстанцыю па хуткасным спуску на лыжах за 1 хв. 22,78 сек., фінішаваўшы 47-м. У слаламе гарналыжнік паказаў час 55,94 і заняў у выніку 34-е месца.

Лыжніцы Юлія Ціханава, Настасся Кірылава, Паліна Сераносава і Валянціна Камінская завяршылі барацьбу ў спрынце класічным стылем на стадыі кваліфікацыі. Аляксандр Воранаў у такім жа відзе праграмы дабраўся да чвэрцьфіналу.

Сёння беларусы прымуць удзел у спаборніцтвах па біятлоне (індывідуальная гонка ў жанчын) і гарналыжным спорце (жаночы слалам).

Дар'я ЛАБАЖЭВІЧ

Загаловак у газеце: Яшчэ ўчора ён паміраў, а сёння выйграў медаль

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...