Вы тут

Для інвалідаў па зроку будзе створаны сэнсарны маршрут па лесе


Гэта міжнародны праект, у якім удзельнічае аддзяленне дзённага знаходжання інвалідаў Цэнтра сацыяльнага абслугоўвання насельніцтва Ленінскага раёна Гродна. Праект «Далучэнне да прыроды» накіраваны на экалагічную асвету людзей з абмежаванымі магчымасцямі па зроку.


Незвычайная экалагічная сцежка будуецца за 30 кіламетраў ад Гродна на тэрыторыі Рэспубліканскага ландшафтнага заказніка «Азёры». Гэта будзе маршрут, які дазволіць людзям з абмежаваным зрокам пазнаёміцца з разнастайнасцю прыроды, а галоўнае — навучыцца бяспечным паводзінам у лесе. На працягу амаль кіламетра турысты змогуць прайсці па сцежцы з покрывам рознага віду — з пяску, гравію, травы, ігліцы. Дарога будзе абмежавана бярвёнамі. Для людзей з поўнай стратай зроку ўздоўж маршруту прымацуюць канат.

Дарэчы, праект далучае і да экалагічнай асветы. На бетонных пляцоўках размесцяцца адбіткі слядоў дзікіх жывёл, якія насяляюць заказнік. Тут з'явяцца сляды зубра, зайца, лісіцы, рысі, барсука і іншых. Між іншым, у ландшафтным заказніку зарэгістравана больш за 170 відаў наземных жывёл, разнастайная і птушыная група, сярод якой больш за дзясятак чырванакніжных. Птушыныя галасы будуць запісвацца на аўдыясістэмы і выкарыстоўвацца як для распазнавання, так і для рэлаксацыі. Яшчэ адзін участак пазнаёміць турыстаў з відамі дрэў, якія яны самі змогуць вызначыць па іх спілах і па кары.

— Гэта будзе сэнсарная сцежка, дзе чалавек з поўнай альбо частковай стратай зроку зможа памацаць усё на сваім шляху, — расказвае кіраўнік праекта, супрацоўнік аддзялення для інвалідаў Галіна Марозік. — Такія веды, як высветлілася, вельмі патрэбныя, бо дапамогуць інвалідам па зроку лепш арыентавацца ў лесе, навучаць асновам бяспечных паводзінаў. Напрыклад, як пазбегнуць укусу кляшча альбо пчалы, што рабіць, калі гэта здарылася, і многае іншае.

А яшчэ ў заказніку будзе абсталяваны спецыяльны цэнтр, дзе плануецца праводзіць навучальныя заняткі. Гэту работу бяруць на сябе супрацоўнікі і студэнты факультэта біялогіі і экалогіі Гродзенскага дзяржаўнага ўніверсітэта імя Янкі Купалы, якія таксама прымаюць удзел у праекце. Для навучэнцаў падрыхтуюць адпаведную літаратуру, у тым ліку з тактыльным шрыфтам Брайля. Тыя, хто пройдзе такія заняткі, змогуць і самі надалей працягваць экалагічную асвету.

— Як паказаў маніторынг, людзям з абмежаванымі магчымасцямі па зроку патрэбны і экалагічныя веды, нейкія навыкі знаходжання на прыродзе. Напрыклад, умець адрозніць карысную ягаду ад ядавітай, добры грыб ад паганкі. Гэта дазволіць часцей выязджаць у лес і атрымліваць новыя ўражанні, — адзначыла Галіна Марозік.

Сэнсарны маршрут плануецца запусціць вясной будучага года, ён разлічаны як на дарослых наведвальнікаў, так і на дзяцей.

У тэму

Гатовы да рэалізацыі трансгранічны праект у рамках праграмы «Літва — Латвія — Беларусь», прызваны пашырыць даступнасць да сацыяльных паслуг. Партнёрамі праекта сталі Цэнтр сацыяльнага абслугоўвання насельніцтва Ленінскага раёна Гродна і адпаведная ўстанова ў літоўскім горадзе Друскінінкай. Беларускаму боку выдаткавана 70 тысяч еўра. На гэтыя сродкі плануецца набыць аўтамабіль для перавозу людзей з інваліднасцю, а таксама пад'ёмнік, які «крочыць» па прыступках. Для аказання такіх паслуг, як кінэзатэрапія і эргатэрапія, будуць закуплены спецыяльныя трэнажоры, якія дапамогуць палепшыць работу суставаў, а таксама праводзіць рэабілітацыю пасля інсультаў і інфарктаў.

Маргарыта УШКЕВІЧ

Загаловак у газеце: Дакрануцца да прыроднай прыгажосці

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...