19 снежня 2007 года
№ 241 (26106)

НАПРЫКАНЦЫ

Арыгінальны рэцэпт "Усходнiх ласункаў"

У гэтыя выхадныя Мiнск у сёмы раз прымаў фестываль па танцы жывата "Усходнiя ласункi", сабраўшы лепшых танцорак рэспублiкi на адной сцэне. Дарэчы, калiсьцi менавiта гэты фэст стаў для танцорак белiдансу пропускам на вялiкую сцэну. Сёння ж у Беларусi праводзяцца чэмпiянаты як рэспублiканскага, так i сусветнага ўзроўню, а танец жывата "прапiсаўся" цi не ў кожным фiтнэс-клубе. 

Сёлета фестываль "дарос" да сцэны Палаца Рэспублiкi, а гэта адпаведны ўзровень — зала на 2500 месцаў, лазернае светлавое шоў, трансляцыя на вялiкiх экранах... Акрамя ўласна яскравай паказальнай часткi, адбыўся конкурс сярод наймацнейшых танцорак Беларусi на лепшы шоў-нумар усходняга танца. Выканаўцам было дазволена выкарыстоўваць практычна ўсё — прадметы, спецэфекты, эклектыку ў музыцы, харэаграфii i касцюмах.

У фiнале сустрэлiся 10 удзельнiц, кожная з якiх прадэманстравала адметнае шоў, — вось i здавалася гледачам, што дзяўчаты вядуць мiж сабой жорсткую барацьбу за гран-пры фестывалю — паездку на дваiх у Егiпет. А яны пасля конкурснай часткi сабралiся ў грымёрках i як старыя сяброўкi гаварылi пра простыя жыццёвыя рэчы, як быццам i не было памiж iмi сапернiцтва. Але на тое i конкурс, каб высветлiць лепшую сярод танцоўшчыц. Ёй, паводле рашэння журы, стала Крысцiна Мыцько (прадстаўляла школу-студыю ўсходняга танца "Фарангiз"). Першае месца заняла Дар’я Лонская, другое — Юлiя Мiраненка, на трэцяй пазiцыi Крысцiна Жарко.

У другiм аддзяленнi фестывалю паказальныя выступленнi прадставiлi зоркi беларускага белiдансу, а таксама чэмпiёнка свету па танцы жывата 2004 года, расiянка Наталля Бекер, якая здолела сумясцiць... экзатычную харэаграфiю i кампазiцыю Дзiмы Бiлана.

Ва "ўсходнi кiрмаш" ператварыўся ў антракце i сам Палац Рэспублiкi: у фае на iмправiзаваных пляцоўках iгралi музыканты, працавалi анiматары, усе ахвотнiкi маглi таксама далучыцца да магii танца жывата, узяўшы ўдзел у конкурсе аматараў. Тут жа iшло галасаванне за Прыз глядацкiх сiмпатый, якi ў вынiку дастаўся уладальнiцы першага прыза "Усходнiх ласункаў-2007" Дар’i Лонскай.

Вольга ЛАСКА, Лiна МАЛІНIНА.